Skip to content

كثر الحديث..أوكتان يا حبيبي أوكتان

May 28, 2012

عن البنزين، أولا نفسي أفهم مين هو الذكي اللي قرر انه بنزين 95 يمثل الفئة الغنية في البلد؟

المشكلة مش بس اللي قرر، المشكلة نسبة أصحاب الفتاوي في الشعب، يعني اللي بقرأ تعليقات الناس بحس الشباب مهندسين كيميا في المصفاة من 17 سنة. زي مثلا ” ال95 ما بعبي منه الا اللي راتبهم فوق ال1000 دينار” ، ” اللي بعبي 95 ما بفرق معه 20 قرش باللتر” ، طبعا 20 قرش بالتر يعني تقريبا حوالي 10 دنانير بالفل..يا فل

المهم، شو يعني بنزين 95 أو 90؟

رقم 90 أو 95 دلالة على قدرة مقاومة البنزين للانفجار أو قدرته على تحمل الضغط قبل الانفجار أو الاحتراق الذاتي. وفي طريقة معتمدة لتحديد هالرقم، وهي مش نسبة (حاليا)، يعني في بنزين بأرقام أعلى من 100

المهم، شو بفيد كل هل حكي؟ بفيد انه المحركات ذات الكفاءة العالية بنضغط فيها البنزين بدرجة أكبر ولهيك بحتاجوا انه البنزين نفسه ما ينحرق ذاتية بمكان ما بدهم يحترق فيه وبوقت مش زي ما بدهم. طيب وشو بصير لو احترق بمكان غلط؟ ممكن ايسبب أضرار داخلية في المحرك وحجرة الاحتراق، وعلى المدى الطويل يمكن يتلف المحرك أو أجزاء منه.

المحركات الحديثة فيها تقنية بتساعد على تجنب الاحتراق الذاتي للبنزين لو المستخدم عبى بنزين 87 مثلا في سيارة بدها 90، يعني وحدة التحكم بالمحرك ممكن اتقلل كفاءة المحرك عشان هل موضوع، وممكن السواق ايحس بضعف بالعزم ( بس أحسن أكيد من خراب المحرك). بس بضل انه ممكن ايصير في أضرار بالمحرك وبعتمد على ظروف وطريقة القيادة ( الحرارة، عدد دورات المحرك، التسارع المفاجيء…)، يعني الموضوع مو محسوم.

طيب يا أخي أنا صارلي فترة بحط 90 وسيارتي بدها 95 وما صار اشي!

شو بعرفك انه ما صار؟ الأضرار ما بتبين بشكل كبير الا على المدى الطويل بالأغلب، يعني ممكن ايكون في أضرار السواق مش عارف عنها أصلا وممكن برضو ما ايكون صار.

بنزين 95 بس للسيارات الغالية؟

لا ما اله دخل، سيارتنا نيسان تيدا 1600 سي سي وسعرها أقل من 10000، وبدها رسميا بنزين 95، هوندا أكورد نفس السنة وسيارة تعتبر فئة أعلى رسميا بدها 91 مع انه أغلى وأفخم ومحرك أكبر. وبرضو الكامري ونيسان باترول 91 . شو بتعبي بالسيارة ما اله علاقة بسعر السيارة أو فخامتها، يعني بأوروبا المرسيدس وال BMW بكونوا ديزل. يعني الحكومة بتعاقب الناس اللي سيارتهم بتطلب نوع معين من البنزين مع انه ما اله خص بالدخل أو فخامة السيارة.

هسا لما رفعوا البنزين 95 شو استفادوا؟ معظم الناس ومنهم أنا حبلش بال90 وبس، لانه الفرق صار هائل. يعني زادوا ضريبة على اشي ما حيصير يستعملوا حد. طيب ما في أفكار ذكية؟ مثلا ليش ما يدرسوا الضرايب على السيارات، ويتم تحسين النظام بحيث يتم تشجيع شراء سيارات بتوفر بنزين، يعني مش منطق اللي بشتري سيارة محركها 800 أو 100 سي سي يتحاسب جمرك وضريبة زي اللي بشتري 6000 سي سي. يعني الحكومة الذكية بلشانة بالبنزين لحد ما صار سعر لتر البنزين المدعوم أعلى من سعره بأمريكا اللي ما بتدعمه وبقطع الالاف الأميال ليوصلهم. سبحان الله. ممكن برضو عكس الموضوع على الترخيص السنوي، اللي محركه مثلا أكبر من حد معين بزيد عليه مثلا فوق ال3000

ليش ما يتم اعادة النظر برسوم السيارات الهجينة، وبرضو اعفاء السيارات اللي محركها صغير بس، مش ال4X4 مثلا. رفع الفاتورة النفطية للبلد مش للبلد، الا اذا في أفراد مستفدين من هل موضوع.

الفكرة انه لما ايتم الرفع، ايكون أثره أكبر على القادر اللي ما رح يتأثر ( يعني ما حينتقل من طبقة متوسطة لطبقة فقيرة )

يعني حاليا استخدام السيارات في الأردن أساسي كون ما في عنا نظام مواصلات يمكن نعتمد عليه، لو في باصات منتظمة ونظام كان ما بحتاج الواحد سيارته ايروح للدوام مثلا.

الخلاصة، ال95 مش للأغنياء وما بعبر عن قيمة السيارة. استخدام بنزين برقم أوكتان أقل من المطلوب ممكن يسبب أضرار وممكن لا.

هذا والله أعلم

Advertisements
No comments yet

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: